Залуу малчны сургууль нь 1969 онд Сайд нарын 167-р тогтоолоор “Хөдөө Аж Ахуйн Техник Мэргэжлийн Сургууль” болон өргөжиж, Даланзадгад сумд төвлөрөн, хөдөө аж ахуйн мэргэжлийн ажилтнуудыг бэлтгэж эхэлсэн.
Техник Мэргэжлийн Сургууль нь Өмнөговь аймаг болон Дундговь аймгаас сурагчид элсүүлж 5 багш, аж ахуйн 11 орон тоотой, 83 сурагчтай сургалтын үйл ажиллагаагаа эхлүүлсэн түүхтэй. Тухайн үед дараах 4 мэргэжлийн ангитай байжээ. Үүнд:
- Малчин - малын санитарч
- Үржил суурийн хоньчин – механизаторч
- Малчин МАА-н барилгачин
- Өрөмдмөл худгийн моторчин - монтажчин
Техник Мэргэжлийн Сургууль болсноор сурагчид 2 жил суралцаж төгсдөг болсон байна.
Ингээд 1970-1971 оны хичээлийн жилд анхныхаа төгсөлтийг хийж малын санитарч 22, үржил суурийн хоньчин - механизаторч 23, малчин МАА-н барилгачин 10, Өрөмдмөл худгийн моторчин 23 мэргэжилтэн залуусыг төгсгөж гаргасан байна.
1971 онд БНМАУ-ын Сайд нарын зөвлөлийн 161 дүгээр тогтоол гарч, тус сургуулийг Өмнөговь аймгийн төв Даланзадгад хотноо шилжүүлэн байршуулахаар болжээ. Ийнхүү тухайн оны хичээлийн жилээс эхлэн ТМС Даланзадгад хотод төвлөрч, Дундговь, Дорноговь, Өвөрхангай, Өмнөговь аймгуудаас Ерөнхий боловсролын сургуулийн 8-р анги төгссөн хүүхдүүдийг элсүүлж, дотуур байр болон хувцас формоор ханган сургадаг говийн бүсийн томоохон сургууль болон өргөжжээ.
Мэргэжлийн ажилчин, малчин бэлтгэн цар хүрээгээ өргөжүүлж, суралцагсдын тоо, багшлах боловсон хүчний хэрэгцээ шаардлагыг харгалзан тухайн хичээлийн жилээс эхлэн жимс-тогоочийн, тэжээл бэлтгэлийн механизаторчин гэсэн мэргэжлийн хоёр анги нэмж хичээллүүлжээ.
Сургуулийн сургалт хүмүүжлийн ажил жил дараалан ахиж, багш нарын заах аргын нэгдэл байгуулагдан, өндөр мэргэжлийн багшлах боловсон хүчнээр бэхжиж, багш нарын бүтэц өөрчлөгдөн нэг ангийг онолын ба мастер багш гэсэн хоёр багш хариуцан ажиллах болжээ.
Суралцагчид дадлага хийх бааз суурь, аж ахуйтай болсноос гадна улсын хэмжээнд тухайн үедээ шилдэг тэргүүний гэгддэг байгууллага, хамт олны тэргүүн туршлагаас суралцах хөдөлгөөн өрнүүлэн ашигласнаар сургуулийн нэр хүнд суралцагсдын идэвх санаачилга улам өссөн байна.
Сургууль нь 1974 онд 204 хүүхдийн дотуур байрын барилгыг ашиглалтад хүлээн авч, хичээл сургалтын үйл ажиллагаагаа явуулах болжээ.
